|
Cellero foi el mio bisagüelu, carreteru que tolos díes diba colos gües camín d´Avilés (comu´l canciu). Foi un personaxe que dexó una fondera huelga nos suyos, pa bien o pa mal. Cellero ye, tamién, el barriu onde vivía y onde viven los Celleros, y Cellero ye la casa.
Del mio bisagúelu cúntense, entovía güei, munchos socedíos, la xente alcuérdase de velu peles caleyes, nos chigres, n´Avilés, siempres colos sos gües, delles vegaes enfiláu, dando saltos enriba´l carru. Yo malapenes lu conocí, pero recuérdolu (magar que yera más bien ñarru) comu un paisanón del que había qu´escondese cuandu los neños tábemos xugando pela quintana y, sobre too, si mos topaba na cuadra de los sos gües, onde nun dexaba entrar a naide. nadie.
Cuandu me plantiyé´l dir a la gueta d´un personaxe col que facer monólogos alcordéme d´elli. Llueu foi tomando vida propia con tol so mundiu: los sos collacios Manolín, Pin, Lin, Fozmartiellu, Xuan, Colás, Perico´l Facha... y además metióse a rucar nel mundiu de güei, na so actualidá. Nun sé qué camentaría aquel bisgüelu si allevantara la tiesta y viera al so biznietu facer lo que fa-y...
Una vegá al añu los sos biznietos facemos una fartura y cuntamos hestories d´él y d´otros. Ye la “fartura los celleros”.
Soy Cellero, probe, llanu,
ñarrucu pero con xeniu.
So fíu del minifundiu
Y nietu d´analfabetos,
Fiyastru d´una amestanza
De maízo, yerba seco,
Morgazo, tarrón, moñiga,
Vilorto y vino perrero.
Milenta vegaes perdí
La casería por neciu,
Milenta volví ganala
Trabayando duru y reciu
Cola carreta y los gües,
Pegoyado y Arpilleru,
La mio muyer sola tierra
Afesoriando, el so pechu
Eclináu, la saya negra
Y l´arguyu bien arrechu.
Curié hasta güei de les vaques,
Mios fíos fueron obreros,
Mios nietos oficinistas,
peones y hasta inxenieros,
magar que mí me pruyía
que dalgún fuera chigreru,
que too oficiu ye persabiu
y necesariu dafecho,
menos especulaores,
chorizos y subasteros.
Soi l´aldea, mios coraes
Lladren igual que los perros,
Estuercen comu meruca
tremen comu xatu espiertu
Que quier ponese de pies
O si a en casa voi melgueru
Cancien igual que´l quiricu.
¡Soi Cellero, bracu, atéu,
Trabayaor, mala tiesta,
Bebeor y falancieru!
¡El día que nun lo seya
llevaime pal cementeriu!
|