EL POLA TORNA'L INSTITUTO (Monólogu p'adolescentes)

Pola, rapaz de trentaypicu d´años, ex fracasu escolar, va cuntar a los espeutadores por qué decidió tornar al institutu depués de venti años. Mientres avanza na hestoria principal va falando, d´una mena humorístico que amesta les formes del “club de la comedia” coles del monologuismu asturianu y la narración oral, sobre los sos nuevos collacios, comparando les semeyanzes y diferencies col so primer bachilleratu. El Pola fala de temes que importen a los adolescentes, comu los primeros averamientos ente “chorbos y chorbes”, los exámenes, el pelligru de les drogues o el acosu escolar... pa terminar confesando por qué decidió ponese a estudiar, falando del so güelu y faciendo un brinde a la comunicación intergeneracional, a la tresmisión de la memoria histórica y al estudiu comu superación personal.
Monólogu encargau pola Oficina de Política Llingüística de Xixón pa estrenase nos III Alcuentros de la Mocedá cola Llingüa, lo que se fizo nel teatru Xovellanos y ante 522 estudiantes de Secundaria y Bachilleratu.
Puede aportase con antelación una unidá didaútica colos temes tresversales trataos nel monólogu: educación sexual, educación pala salud (prevención del consumu de drogues), educación pala convivencia, la tolerancia y´l respetu (conflictu interxeneracional, diversidá cultural), ente otros. Dotramiente, queda abierta la posibilidá de adautar delles partes del guión a nuevos temes propuestos poles entidaes contratantes.