El proyectu teatral TOC-CHOBRE (Teatru Obreru y Campesín Ochobre) tien l´oxetivu de la recuperación, igüa y espardimientu de les formes del teatru popular, y l´aplicación a estes formes de conteníos d´educación social, enxertando´l procesu teatral nel marcu de dinámiques sociales más grandes.
Compuestu por Carlos Alba y Vanessa Peña, quier de mano experimentar col Teatru de la Memoria, daqué qu´ambos dos, dende´l monólogu y narración oral el primeru; dende la educación social la segunda, tienen fecho ya. El so determín ye entamala con un mestu de talleres y representaciones. Ye urxente amestar la recuperación de la memoria histórica col teatru popular y´l Teatru de Narración.
Nesti sen, sorrayar los espectáculos del italianu Ascanio Celestini de los que fala Marina Sanfilippo nel so estudiu “El renacimiento de la narración oral en Italia y España (1985-2005)”  (Fundación Universitaria Española, Madrid, 2007).
En Latinoamérica, dende los años setenta, tiénense fecho experiencies de´sta triba, como les del teatru Escambray, en Cuba. Dotramiente, el director chilenu Fernando Aguilera tresladó la xuntanza de memoria-participación social-teatru popular, a dellos pueblos y ciudaes de Madril y Castilla-La Mancha (Morata, Tarancón, Alcalá de Henares…), con resultaos perbonos.

 

Falando de teatru popular (…) pienso nel teatru de mases inferiores que, en tolos tiempos, opusieron el so arte espontáneu al arte de les clases dominantes. Llibres de les cadenes de la civilización oficial, estes mases daben gustu al so instintu teatral igüando unes formes y unos procedimientos que, nos pueblos más estremaos, presenten a veces unes coincidencies sorprendentes. (…) Constátase un estilu popular universal.
S. Mokulski